«Türkmenpoçta» poçta aragatnaşyk kompaniýasy «TMDrops» logistika gullugy bilen hyzmatdaşlyk etmek arkaly, Türkmenistanyň ýaşaýjylary üçin halkara onlaýn söwda mümkinçilikleriniň giňeldilýändigini mälim etdi. Täze çözgütler «Amazon», «eBay» we «Zara» ýaly meşhur daşary ýurt internet-dükanlaryndan harytlary sargyt etmäge we olary Türkmenistana getirtmäge şert döredýär.
Kompaniýanyň berýän maglumatyna görä, bu hyzmat ulanyjylara ABŞ-da hem-de Italiýa we Gresiýa ýaly Ýewropa ýurtlarynda şahsy wirtual salgylary hödürleýär. Hasaba durulandan soňra, müşderä internet-dükanynda sargyt rasmileşdirilende ulanyp biljek aýratyn daşary ýurt salgysy we şahsy identifikatory berilýär.
Halkara daşamalary we eltip bermek işlerini «Türkmenpoçta» öz üstüne alýar, «TMDrops» bolsa sargytlaryň yzarlanmagyny we logistika goldawyny üpjün edýär. Gullugyň berýän maglumatlaryna görä, harytlary eltip bermegiň ortaça möhleti ABŞ-dan 10 günden 20 güne çenli, Ýewropa ýurtlaryndan bolsa 7 günden 14 güne çenli wagt alýar.
Hyzmatlaryň bahasy ugradylýan harydyň hakyky agramyna görä hasaplanýar, bu bolsa alyjylara çykdajylary öňünden meýilleşdirmäge mümkinçilik berýär. Ähli halkara ugratmalar Türkmenistanyň kanunçylygyna laýyklykda hökmany gümrük barlagyndan geçirilýär.
Kompaniýada bu hyzmatyň we maglumat goldawynyň türkmen, rus we iňlis dillerinde elýeterlidigi bellenildi. Şertler barada has giňişleýin maglumaty «TMDrops» logistika gullugynyň resmi saýtyndan alyp bilersiňiz.
Türkmenistanyň Aragatnaşyk ministrliginiň wekilleri 27 — 29-njy aprel aralygynda Tokio şäherinde geçirilen «SusHi Tech Tokyo 2026» halkara innowasion forumyna gatnaşdy. Bu barada Türkmenistanyň DIM-niň resmi saýtynda habar berildi.
Habarda bellenilişi ýaly, innowasion foruma dünýäniň dürli ýurtlaryndan kompaniýalar, startaplar we tehnologiýa hünärmenleri gatnaşdylar. Forumuň esasy maksady — täze tehnologiýalary, innowasiýalary we sanly çözgütleri görkezmek hem-de halkara hyzmatdaşlygy ösdürmekden ybarat boldy.
Forumyň dowamynda emeli aň (AI), 5G/6G aragatnaşyk ulgamlary, «akylly» şäherler (smart city), ýaşyl energiýa we sanly ykdysadyýet ýaly möhüm ugurlar boýunça çykyşlar we sergiler geçirildi. Gatnaşyjylar täze önümler bilen tanyşmaga, tejribe alyşmaga we hyzmatdaşlyk mümkinçiliklerini ara alyp maslahatlaşmaga mümkinçilik aldylar.
Forumyň çäklerinde türkmen wekiliýeti tehnologiýa we sanly ösüş ugurlarynda öňdebaryjy birnäçe daşary ýurt kompaniýalarynyň wekilleri bilen iş duşuşyklaryny we gepleşikleri geçirdi.
Duşuşyklarda sanly infrastruktura we telekommunikasiýa hyzmatdaşlygy ýola goýmak, emeli aň (AI) we sanly hyzmatlar, «Akylly şäher» çözgütleri (Smart City) — şäher dolandyryşy, Startap ekosistemasy — halkara startap platformalary we tehnologiýa merkezleri bilen ýaş startaplary ösdürmegiň hem-de gelejekde bilelikdäki taslamalary amala aşyrmagyň mümkinçilikleri ara alnyp maslahatlaşyldy.
e.gov.tm Döwlet hyzmatlarynyň resmi internet portalynyň ulanyjylar sany artmagyny dowam edýär. Platforma işe girizilenden bäri döwlet aragatnaşyk hyzmatlarynyň dürli görnüşlerini elektron formatda birleşdirdi.
Häzirki wagtda portalda 500-dan gowrak hyzmat elýeterlidir, bu bolsa ony raýatlar bilen döwlet edaralarynyň arasyndaky hyzmatdaşlygyň esasy sanly guralyna öwürýär.
Portal ulanyjylar üçin amatlylygy we wagt tygşytlylygyny üpjün etmek bilen, onlaýn tertipde hyzmatlardan peýdalanmaga mümkinçilik berýär. Şeýle-de mobil goşundy hem elýeterli bolup, ony Android we iOS platformalaryndan ýükläp alyp bolýar. e.gov.tm portalynyň interfeýsi aňsat we amatly bolup, dürli ýaşdaky ulanyjylar topary üçin düşnüklidir.
