Türkmenistanyň Prezidenti Serdar Berdimuhamedow «Türkmenistanda on iki ýyllyk umumy orta bilime geçmegiň Konsepsiýasy» esasynda 12 ýyllyk okuw maksatnamalary boýunça bilim alan ilkinji uçurymlara Gutlag iberdi. «Türkmenistan» gazetinde ýerleşdirilen Gutlagda şeýle bellenilýär:
«Sizi Berkarar döwletiň täze eýýamynyň Galkynyşy döwrüne ajaýyp öwüşgin çaýýan hem-de bagtyýar ýaşlarymyzy süýji arzuwlara, ýakymly duýgulara besleýän «Soňky jaň» dabarasy bilen tüýs ýürekden gutlaýaryn. Garaşsyz ýurdumyzyň hemişelik Bitaraplygynyň şanly 30 ýyllygynyň halkara derejede giňden bellenilýän Halkara parahatçylyk we ynanyşmak ýylynda bilimler baýramyna bagyşlanyp geçiriljek dabaralaryň uçurymlarymyzyň kalbynda eziz Watanymyzyň şöhratly geçmişine, şu gününe hem-de beýik geljegine buýsanjy has-da artdyrjakdygyna berk ynanýaryn.
Berkarar döwletiň täze eýýamynyň Galkynyşy döwrüniň bagtyýar uçurymlary!
Siz türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň öňdengörüjilikli beýik başlangyjy bilen işlenip taýýarlanan «Türkmenistanda on iki ýyllyk umumy orta bilime geçmegiň Konsepsiýasy» esasynda 12 ýyllyk okuw maksatnamalary boýunça bilim alan ilkinji uçurymlar bolup durýarsyňyz. Bu geçen döwrüň içinde milli bilim ulgamyny dünýä ölçeglerine, umumy ykrar edilen halkara kadalara laýyklykda kämilleşdirmek ugrunda toplumlaýyn işler amala aşyryldy. Size okatmagyň öňdebaryjy usullary, ylmyň gazananlary hem-de innowasion tehnologiýalar arkaly döwrebap bilim berildi. Siziň okan döwrüňizde halkara bilim bäsleşiklerinde gazanan uly üstünlikleriňiz Watanymyzyň abraýydyr, biziň alyp barýan bilim özgertmelerimiziň ajaýyp miweleridir.
Hormatly mugallymlar we bilim işgärleri!
Türkmen halky ylmyň we bilimiň egsilmez güýjüne gadymy döwürlerden akyl ýetiren, okamagy, öwrenmegi, döretmegi hem-de gurmagy durmuş mekdebine öwren halkdyr. Gadymy Jeýtunda, Änewde, Nusaýda, Merwde, Gürgençde hem-de Amulda ylym-bilim ösüşiň iň möhüm şerti bolupdyr. Ylym we bilim geçmişde bolşy ýaly, häzirki döwürde-de ähli ösüşlerimiziň binýadyny düzýär. Biz bu gymmatly baýlygymyz arkaly Garaşsyz Watanymyzyň geljegini gurýarys. Şoňa görä-de, biz geljekde hem ylymly-bilimli, giň dünýägaraýyşly, başarjaň, maksada okgunly nesilleri terbiýelemek üçin ähli tagallalary ederis. Ýaş nesillerimiziň bilimlerini yzygiderli artdyrmak üçin okuw dersleriniň mazmunyny milli tejribelerimize, ylymlaryň we bilimleriň täze gazananlaryna laýyklykda has-da baýlaşdyrarys, döwrebap okuw kitaplaryny, gollanmalary taýýarlarys.
«Watan diňe halky bilen Watandyr! Döwlet diňe halky bilen döwletdir!» diýen ýörelgeden ugur alyp, milli bilim ulgamyny mundan beýläk-de ösdürmäge aýratyn uly üns bereris. Bitarap Watanymyzyň ähli ýerlerinde döwrebap çagalar baglaryny, orta mekdepleri gurup, ýaş nesillerimiziň ýokary hilli bilim almagy we sagdyn ösmegi üçin oňaýly şertleri döretmek ugrundaky işleriň depginini has-da güýçlendireris. Dünýädäki iň abraýly we hormatly kärleriň birine eýe bolan mugallymlarymyzyň döredijilikli zähmet çekmegi üçin ähli amatly mümkinçilikleri dörederis, olaryň ýaşaýyş-durmuş derejesini has-da ýokarlandyrmak barada yzygiderli alada ederis.
Mähriban uçurymlar!
Siz Watanymyzyň beýik geljegini gurýan nesillersiňiz. Il-günümiziň hem-de bütin adamzadyň bagtyýarlygyna gönükdirilen belent maksatlarymyza ýetmekde size aýratyn bil baglaýarys. Şoňa görä-de, siz durmuş ýoluňyzdaky indiki täze ädimlere has aýgytly we ruhubelentlik bilen gadam basmalysyňyz, eziz Watanymyzyň, halkymyzyň bähbidi ugrunda okamak, döretmek arkaly hemişe öňe gitmelisiňiz. Siz gözbaşy has gadymy döwürlerden gaýdýan milli ýörelgelerimizden, müňýyllyklaryň dowamynda toplanan tejribelerimizden ugur alyp, eziz Diýarymyza, mähriban halkymyza bolan beýik söýgiňiz bilen berkarar Watanymyzyň dünýädäki abraýyny, mertebesini, şan-şöhratyny has-da beýgeltmelisiňiz. Oguz han, Gorkut ata, Görogly beg, Alp Arslan, Jelaleddin Menguberdi ýaly beýik ärlerimiziň, Mahmyt Kaşgarly, Abu Seýit Abulhaýyr, Hoja Ahmet Ýasawy, Baýram han, Döwletmämmet Azady, Magtymguly Pyragy ýaly ägirtlerimiziň dürdäne öwüt-ündewlerine eýerip, bilimleriňiziň, garaýyşlaryňyzyň derejesini yzygiderli ýokarlandyrmalysyňyz.
Hormatly mugallymlar we bilim işgärleri!
Mähriban uçurymlar!
Sizi «Soňky jaň» dabarasy we okuw ýylyny üstünlikli tamamlamagyňyz mynasybetli ýene-de bir gezek tüýs ýürekden gutlaýaryn. Size berk jan saglyk, abadan we bagtyýar durmuş, berkarar Watanymyzyň mundan beýläk-de gülläp ösmegi ugrunda alyp barýan işleriňizde hem-de okuwlaryňyzda uly üstünlikleri arzuw edýärin».

22-nji maýda wideoaragatnaşyk görnüşinde Birleşen Milletler Guramasynyň Türkmenistandaky ýurt boýunça toparynyň mejlisi geçirildi. Duşuşyga Türkmenistanyň daşary işler ministri Raşid Meredow, BMG-niň Türkmenistandaky agentlikleriniň we bu guramanyň sebitleýin düzümleriniň ýolbaşçylary gatnaşdylar.

19-njy maýdan başlap, «Türkmenistan» awiakompaniýasy» AGPJ-i tarapyndan Balkanabatdaky täze howa menziline yzygiderli gatnawlar ýola goýuldy. Awiakompaniýa şu seneden ýurduň ähli sebitlerinde ilata degişli gatnaw hyzmatlaryny ýerine ýetirip başlady.
Ozal habar berşimiz ýaly, 19-njy maýdan başlap «Türkmenistan» awiakompaniýasy Türkmenbaşy şäherine ähli uçuşlary ýatyrdy. Has takygy, Aşgabat — Türkmenbaşy — Aşgabat, Türkmenabat — Türkmenbaşy — Türkmenabat, Mary — Türkmenbaşy — Mary we Daşaguz — Türkmenbaşy — Daşoguz ugurlary boýunça ýerine ýetirilýän gatnawlar wagtlaýyn ýatyryldy.
Bu ugrularyň deregine awiakompaniýa tarapyndan Aşgabat — Balkanabat — Aşgabat, Türkmenabat — Balkanabat — Türkmenabat, Mary — Balkanabat — Mary we Daşaguz — Balkanabat — Daşoguz ugurlary boýunça gatnawlar ýerine ýetirilip başlaýar. Bu barada awiakompaniýa resmi saýtynda habar berdi.
Howa menziliniň hyzmatlaryndan peýdalanan ilkinji ýolagçylar täze terminalyň häzirki zaman infrastrukturasyny, amatly şertlerini we ýokary hyzmat derejesini belläp, sosial ulgamlarda oňyn täsirlerini paýlaşýarlar.

«Türkmengaz» hem-de «Türkmennebit» döwlet konsernlerine Malaýziýanyň «PETRONAS Çarigali (Türkmenistan) Sdn. Bhd.» we Birleşen Arap Emirlikleriniň «ADNOC Turkmenistan RSC Limited» kompaniýalary bilen şertnamalary baglaşmaga ygtyýar berildi. «Watan» habarlar gepleşiginde habar berlişi ýaly, Türkmenistanyň Prezidenti Serdar Berdimuhamedow şu gün degişli resminamalara gol çekdi.

Resminamalar Türkmenistanyň nebitgaz pudagynyň öňünde goýlan wezipeleri üstünlikli durmuşa geçirmek maksady bilen kabul edildi.

“Arkadag” futbol topary, AFK-nyň Çagyryş ligasyndaky çykyşyny ýeňiş bilen tamamlady we finalda Kambojanyň “Preah Khan Reach Svay Rieng” futbol toparyndan goşmaça wagtda 2:1 hasabynda ýeňiş gazandy. Mekan Saparowyň we Altymyrat Annadurdyýewiň gollary türkmen toparyna abraýly kubogy getirdi.
Finala çenli Wladimir Baýramowyň ýolbaşçylygyndaky “Arkadag” futbol topary “Maziya Sport”, “Abdyş-Ata” we “Al-Arabi” toparlarynyndan üstün çykyp, toparçada ynamly ýeňiş gazandy. Pleý-offda Hindistanyň “Ist Bengal” we ýarym finalda Kuweýtiň “Al Arabi” futbol toparynyndan ýeňiş gazandy. “Arkadagyň” garşydaşy “Preah Khan Reach Svay Rieng” finaldan oýnundan öň “Şan Ýunaýted” we “Madura Ýunaýted” toparlaryndan üstün çykdy.

“Arkadag” toparynyň bu ýeňşi, ýurduň ýolbaşçylyklalarynyň ünsi we goldawy netijesinde milli sportuň ösýändigini görkezip, türkmen futbolynyň taryhynda möhüm tapgyra öwrüldi.

Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Ol welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, şu ýyl bugdaýyň bol hasylyny ösdürip ýetişdirmek maksady bilen, gallaçy daýhanlar tarapyndan bugdaý ekilen meýdanlara ideg etmek, ösüş suwuny tutmak işleri alnyp barylýar. Gowaça ekilen meýdanlara gögeriş suwuny tutmak, hatarara bejergi, ýekelemek we otag etmek işleri ýerine ýetirilýär. Şunda oba hojalyk tehnikalary netijeli işledilýär. Welaýatyň ýazlyk ýeralma, gök-bakja ekinleri ekilen meýdanlarynda agrotehnikanyň kadalaryna laýyklykda ideg işleri dowam etdirilýär. Sebitde pile möwsümini guramaçylykly geçirmek we bu ugurda bellenen meýilnamany üstünlikli ýerine ýetirmek üçin zerur çäreler görülýär. Şeýle hem häkim «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna”, «Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin Milli maksatnamasyna» laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, möwsümleýin işleriň agrotehnikanyň kadalaryna laýyklykda, ýokary hilli geçirilmeginiň zerurdygyny belledi we häkime degişli tabşyryklary berdi. Şeýle-de döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, welaýatda şu ýyl üçin meýilleşdirilen işleriň öz wagtynda, ýokary hilli ýerine ýetirilmegini gözegçilikde saklamagy tabşyrdy.

Soňra Balkan welaýatynyň häkimi H.Aşyrmyradowa söz berildi. Häkim, ilki bilen, Balkanabat Halkara howa menzilini açyp berendigi üçin hormatly Prezidentimize welaýatyň ähli ýaşaýjylarynyň adyndan hoşallyk bildirip, döwlet Baştutanymyza hem-de türkmen halkynyň Milli Lideri Gahryman Arkadagymyza tüýs ýürekden berk jan saglyk, il-ýurt bähbitli tutumly işleriniň hemişe rowaçlyklara beslenmegini arzuw etdi. Soňra ol welaýatda dowam edýän oba hojalyk işleri barada hasabat berdi.

Bellenilişi ýaly, häzirki wagtda bugdaý ekilen meýdanlara ideg etmek, ösüş suwuny tutmak işleri ýerine ýetirilýär. Gowaça ekilen meýdanlara gögeriş suwuny tutmak, gögeriş alnan meýdanlara bolsa hatarara bejergi, otag etmek, ýekelemek işleri dowam edýär. Bu işlerde oba hojalyk tehnikalaryndan netijeli peýdalanylýar. Welaýatyň ýazlyk ýeralma, gök-bakja ekinleri ekilen meýdanlarynda agrotehnikanyň kadalaryna laýyklykda möwsümleýin ideg işleri geçirilýär. Sebitde pile öndürmek boýunça bellenilen meýilnamany üstünlikli ýerine ýetirmek maksady bilen, pileçi kärendeçiler tarapyndan ýüpek gurçugyna ideg etmek işleri alnyp barylýar. Şeýle-de häkim ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, oba hojalyk işlerinde agrotehnikanyň kadalarynyň berk berjaý edilmeginiň, ekinlerden bol hasyl almak bilen bir hatarda, ýer-suw serişdelerinden hem netijeli peýdalanmaga ýardam edýändigini belledi we bu ugurda alnyp barylýan işleri gözegçilikde saklamagy tabşyrdy. Döwlet Baştutanymyz şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň ýokary hilli ýerine ýetirilmegini üpjün etmek barada-da tabşyryklary berdi.

Daşoguz welaýatynyň häkimi D.Babaýew welaýatdaky möwsümleýin oba hojalyk işleri barada hasabat berdi.

Bellenilişi ýaly, şu günler bugdaý ekilen meýdanlara agrotehnikanyň kadalaryna laýyklykda ideg etmek, ösüş suwuny tutmak işleri alnyp barylýar. Welaýatda gowaça ekişi tamamlaýjy tapgyrda dowam edýär. Gögeriş alnan meýdanlarda hatarara bejergi, otag etmek, ýekelemek işleri geçirilýär. Ýazlyk ýeralma, beýleki gök-bakja ekinleri ekilen meýdanlara ideg etmek, suw tutmak işleri ýerine ýetirilýär. Welaýatda şaly ekişine girişilip, möwsümi guramaçylykly geçirmek boýunça zerur çäreler görülýär. Pile möwsüminiň çäklerinde ýüpekçi kärendeçiler tarapyndan ýüpek gurçugyna ideg etmek işleri dowam edýär. Mundan başga-da, häkim ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna, Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, gowaça ekişiniň bellenen möhletlerde ýokary hilli geçirilmeginiň, bugdaý ekilen meýdanlardaky ideg işleriniň agrotehnikanyň kadalaryna laýyklykda geçirilmeginiň möhüm talap bolup durýandygyny belledi we bu babatda degişli tabşyryklary berdi. Şeýle-de döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň bellenilen möhletlerde ýerine ýetirilmegini gözegçilikde saklamagy tabşyrdy.

Lebap welaýatynyň häkimi M.Annanepesow welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, hormatly Prezidentimiziň ýurdumyzda öndürilýän oba hojalyk önümleriniň möçberini artdyrmak barada öňde goýan wezipelerinden ugur alnyp, sebitiň bugdaý ekilen meýdanlarynda agrotehnikanyň kadalaryna laýyklykda ösüş suwy tutulýar. Gowaça ekilen meýdanlarda pagtaçy babadaýhanlar tarapyndan gögeriş suwuny tutmak, endigan gögeriş alnan ýerlerde hatarara bejergi, ýekelemek, otag işleri alnyp barylýar. Ýazlyk ýeralma, sogan ekilen meýdanlarda ideg işleri dowam edýär. Welaýatda ýetişdirilen pile hasylyny ýygnamak we döwlet harmanyna tabşyrmak işlerine girişildi. Şeýle-de häkim ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna, Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, möwsümleýin oba hojalyk işleriniň talabalaýyk geçirilmeginiň, bu işlerde oba hojalyk tehnikalaryny netijeli peýdalanmagyň möhümdigini belledi we degişli tabşyryklary berdi. Döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalarda bellenilen wezipeleriň üstünlikli ýerine ýetirilmeginiň zerurdygyna ünsi çekdi hem-de häkime bu ugurda alnyp barylýan işleri gözegçilikde saklamagy tabşyrdy.

Mary welaýatynyň häkimi B.Orazow welaýatda dowam edýän möwsümleýin oba hojalyk işleriniň barşy barada hasabat berdi. Bellenilişi ýaly, sebitde bugdaý ekilen meýdanlarda ösüş suwy tutulýar. Bugdaý oragyna guramaçylykly girişmek maksady bilen, galla kabul ediş kärhanalaryny, elewatorlary, däne ýygýan kombaýnlary we beýleki tehnikalary möwsüme taýýar etmek babatda zerur çäreler görülýär. Kadaly gögeriş alnan gowaça meýdanlarynda hatarara bejergi, otag etmek, ýekelemek işleri geçirilýär. Welaýatyň ýazlyk ýeralma, sogan we beýleki gök-bakja ekinleri ekilen meýdanlarynda ideg işleri alnyp barylýar. Şeýle hem pile öndürmek boýunça meýilnamany üstünlikli ýerine ýetirmek maksady bilen, pile öndürijiler tarapyndan ýüpek gurçugyna ideg etmek işleri dowam edýär. Mundan başga-da, häkim “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna”, Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş we önümçilik maksatly desgalardaky gurluşyk işleri barada hasabat berdi.

Hormatly Prezidentimiz hasabaty diňläp, agrotehniki çäreleriň talabalaýyk geçirilmeginiň geljekde oba hojalyk ekinlerinden bol hasyl almagyň esasy şerti bolup durýandygyny belledi we häkime degişli tabşyryklary berdi. Şeýle-de döwlet Baştutanymyz ýurdumyzy durmuş-ykdysady taýdan ösdürmek boýunça maksatnamalara laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzda dowam edýän möwsümleýin işler barada hasabat berdi.

Bellenilişi ýaly, häzirki wagtda welaýatlaryň bugdaý ekilen meýdanlarynda agrotehnikanyň kadalaryna laýyklykda ideg etmek işleri alnyp barylýar. Bugdaý oragy möwsümine taýýarlyk görmegiň çäklerinde galla kabul ediş kärhanalaryny, elewatorlary, kombaýnlary, beýleki tehnikalary möwsüme doly taýýar etmek babatda zerur çäreler görülýär. Gowaça ekilen meýdanlarda gögeriş suwuny tutmak, gögeriş alnan ýerlerde hatarara bejergi, ýekelemek, otag etmek işleri alnyp barylýar. Ýurdumyzda azyk bolçulygyny has-da pugtalandyrmak barada öňde goýlan wezipeleri üstünlikli ýerine ýetirmek maksady bilen, ýazlyk ýeralma, gök-bakja we beýleki azyklyk ekinleri ekilen meýdanlarda ideg işleri ýerine ýetirilýär. Daşoguz welaýatynda şaly ekişi dowam edýär. Pile möwsüminiň çäklerinde welaýatlarda ýüpek gurçugyna ideg etmek, ýetişdirilen pile hasylyny ýygnap almak işleri alnyp barylýar. Diýarymyzyň tokaý zolaklarynda, öri we ekin meýdanlarynda ýangynyň döremeginiň öňüni almak maksady bilen, ýangyna garşy gorag zolaklaryny döretmek boýunça arassaçylyk hem-de sürüm işleri geçirilýär.

Hormatly Prezidentimiz Serdar Berdimuhamedow hasabaty diňläp, ýurdumyzda oba hojalyk önümleriniň öndürilýän möçberini yzygiderli artdyrmak, pudagy toplumlaýyn ösdürmek boýunça öňde goýlan wezipeleriň üstünlikli ýerine ýetirilmeginiň möhümdigini belledi hem-de wise-premýere degişli tabşyryklary berdi.

Soňra döwlet Baştutanymyz iş maslahatyna gatnaşyjylara ýüzlenip, welaýatlarda gögeriş alnan gowaça meýdanlarynda hatarara bejergi hem-de ýekelemek, otag etmek işleriniň alnyp barlyşyny berk gözegçilikde saklamagy, gowaça ideg etmekde oba hojalyk tehnikalaryny doly güýjünde peýdalanmak üçin zerur çäreleri görmegi, bugdaý ekilen meýdanlarda ideg işleriniň agrotehniki kadalara laýyk geçirilmegini üpjün etmegi, bugdaý ekilen meýdanlarda zyýan berijileriň ýüze çykmagynyň öňüni almak boýunça zerur çäreleri görmegi tabşyrdy. Şunuň bilen birlikde, hormatly Prezidentimiz ýazlyk ýeralma, gök-bakja ekinleri ekilen meýdanlara talabalaýyk ideg edilmeginiň, Daşoguz welaýatynda şaly ekişiniň bellenen möhletlerde geçirilmeginiň, welaýatlarda ýüpek gurçugyna ideg etmek, pile taýýarlamak boýunça netijeli işleriň alnyp barylmagynyň zerurdygyny belledi.

Döwlet Baştutanymyz pagta we bugdaý öndürijiler bilen hyzmat ediji edara-kärhanalaryň arasynda ýerine ýetirilen işler üçin hasaplaşyklaryň wagtynda geçirilmegini gazanmak, tokaý zolaklarynda, öri we ekin meýdanlarynda ýangyn döremeginiň öňüni almak boýunça geçirilýän işleri berk gözegçilikde saklamagy, ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna, Oba milli maksatnamasyna laýyklykda, welaýatlarda şu ýyl meýilleşdirilen işleriň bellenen möhletlerde ýerine ýetirilmegi üçin zerur çäreleri görmegi tabşyrdy.

Hormatly Prezidentimiz Serdar Berdimuhamedow iş maslahatyny jemläp, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Özbegistanyň Samarkant şäherine amala aşyrýan saparynyň çäklerinde ýurduň Prezidenti Şawkat Mirziýoýew bilen bilelikde Hezreti Hyzyr ýadygärlikler toplumyna baryp, Özbegistan Respublikasynyň ilkinji Prezidenti Islam Karimowy hatyralady.

Ýaponiýa iş saparynyň çäginde Türkmenistanyň Prezidenti Serdar Berdimuhamedow Ýaponiýanyň Imperatory Naruhito bilen duşuşyk geçirdi.

Söhbetdeşligiň dowamynda taraplar ykdysadyýete, tehnologiýa we ynsanperwer ulgamlaryndaky özara hyzmatdaşlyga aýratyn üns bermek bilen döwletara gatnaşyklaryň geljegini ara alyp maslahatlaşdylar. Bellenilişi ýaly, Ýaponiýa öňdebaryjy tehnologiýalary we ösen senagaty bilen dünýäde öňdäki orunlary eýeleýär. Tebigy serişdeleriň ägirt uly gorlaryna eýe bolan Türkmenistan, öz gezeginde, öňdebaryjy ýapon tehnologiýalaryny ulanmak arkaly bu baýlyklary has netijeli peýdalanmaga gyzyklanma bildirýär.

Türkmenistan milli ykdysadyýetiň pudaklaryny, şol sanda elektroenergetika, nebitgaz senagaty, himiýa, gurluşyk, ulag hem-de oba hojalygy pudaklaryny işjeň döwrebaplaşdyrýar diýip, Prezident Serdar Berdimuhamedow nygtady. Şunuň bilen baglylykda, Ýaponiýa innowasion çemeleşmeler we häzirki zaman tehnologiýalar arkaly ýurduň durnukly ösüşine goşant goşup biljek möhüm hyzmatdaş hökmünde garalýar.

Söhbetdeşlikde energiýanyň dikeldilýän çeşmeleri, maglumat tehnologiýalary, ekologiýa, durnukly ösüş ýaly ugurlardaky bilelikdäki taslamalara aýratyn üns berildi. Türkmenistanyň Prezidenti bu ugurlardaky hyzmatdaşlygyň iki ýurt üçin hem gowy netijeleri berjekdigine ynam bildirdi.

Medeni-ynsanperwer ulgam ikitaraplaýyn gatnaşyklaryň möhüm ugurlarynyň hatarynda görkezildi. Ýapon medeniýeti, sungaty we däp-dessurlary Türkmenistanda hemişe uly hormat hem-de gyzyklanma döredýändigi bellenildi. Şunuň bilen birlikde, türkmen medeniýetine-de Ýaponiýada hem uly gyzyklanma bildirilýär.

Imperator Naruhito bilim ulgamynda ýola goýlan hyzmatdaşlygyň ähmiýetini belläp, Türkmenistanyň orta we ýokary okuw mekdeplerinde ýapon diliniň öwredilmeginiň halklary ýakynlaşdyrmak üçin oňyn ädimdigini belläp geçdi.

Prezident Serdar Berdimuhamedow ýurtlarymyzyň arasyndaky gatnaşyklary ösdürmäge goşýan şahsy goşandy üçin Imperator Naruhito minnetdarlyk bildirdi we ony mundan beýläk-de pugtalandyrmaga Türkmenistanyň taýýardygyny tassyklady.

Duşuşygyň ahyrynda taraplar birek-birege iň gowy arzuwlaryny beýan etdiler we Türkmenistan bilen Ýaponiýanyň arasyndaky strategiki hyzmatdaşlygyň mundan beýläk-de pugtalandyryljakdygyna ynam bildirdiler.

12-nji aprelde, şenbe güni Türkmenistanyň Mejlisiniň ýedinji çagyrylyşynyň sekizinji maslahaty geçirildi. Maslahatda “Kazyýet hakynda” (täze beýany), “1966-njy ýylyň Ýük markalary hakynda Halkara konwensiýasyna degişli 1988-nji ýylyň Teswirnamasyna goşulmak hakynda” Türkmenistanyň Kanunlarynyň taslamalary ara alnyp maslahatlaşyldy hem-de biragyzdan kabul edildi.

Maslahatyň dowamynda Türkmenistanda adam hukuklary boýunça ygtyýarly wekili ‒ Adalatçynyň maglumaty diňlenildi diýip, Mejlisiň web sahypasynda habar berilýär.

Şeýle hem maslahatda käbir kanunlara şol sanda “Administratiw önümçilik hakynda” “Awtomobil ulagy hakynda”, “Migrasiýa hakynda” Türkmenistanyň Kanunlara üýtgetmeler we goşmaçalar girizmek hakynda Türkmenistanyň Kanunlarynyň taslamalary ara alnyp maslahatlaşyldy hem-de kabul edildi.